SING VIR MY

Sing vir my saggies. Vertel my waar gaan ons heen
Want dis net jy wat die kille nanag,
Gekruisig deur ‘n sterwende son sal kan besweer, wat my soektog na jou liefde sal kan laat verweer

Sing my deur die skemer dood na daar waar die mis ons saam kan weef. Want dis die blou maan wat deur die venster van my hart ‘n waserige soeklig oor jou laat leef.

Sing vir my hoe ek jou hart kan annekseer.
Hoe ek elke gedeelte van jou liggaam , siel, vrese en sal kan beheer. Hoe kortsigtig ook al. Ek vra jou mooi sing vir saggies, sing vir my weer.

Sing vir my oor dit wat jou pla. Wil jy werklik alleen aan alles dra. Want as ek weet sou ek dalk kon verstaan wat alles in jou wêreld omgaan
Sing vir my waar ek moet loop krap waar sal ek iets uit die stowwerige rakke van jou verlede kan haal. Want ek wil iets wys raak iets hoopvol iets wat sin maak

Sing vir my hoe ek jou hart kan annekseer. Hoe ek elke deel van jou liggaam siel en vrese sal kan beheer . Hoe kortstondig ook al. Ek vra jou mooi, sing vir my saggies. Sing vir my weer.

(Petro Roosendal)

Ek wonder oor hierdie boom…

Ek wil so graag vir jou sê
Dat ek my hart vir jou sal gee
Op ‘n silwer skinkbord en met liefde garneer
Dat ek jou nooit sal verneuk nie
En wil jou saamvat vir vakansies by die see.

Ek wil hê jy moet verstaan
Jy maak my mal, gelukkig en skaam

Ek wil hê dat jy in my oë moet inkyk
En sien hoe ek oor jou voel
Want dis nie altyd maklik om dit te gelyk
Ek is partykeer in my kettings en spinnerakke toegewoel

Ek is bang dat ek jou sal verveel
Bang vir iets kosbaar en breekbaar
Vreesbevang vir ‘n tree in die donker
Dat ek jou hart sal beseer.

Ek wil jou elke dag by my hê
Jou hand vashou in die kerk
En aan jou dink by die werk
Jou beskerm teen pyn en leed
Ek wil he jy moet weet.

- Manie Geldenhuys

Totius (Jakob Daniël du Toit, 1877-1953):

Totius se jukstaponering van die gegoede treinpassasier en die arm meisietjie by die tent wat altwee na mekaar se wêrelde hunker, bly tot vandag toe ‘n treffende uitbeelding van die mens se rustelose strewe na die “beter lewe” wat altyd op ‘n ander plek sou bestaan.

Repos ailleurs (Die rus is elders)

In die eensame veld staan ‘n tentjie klein,
en daarnaas in die skeemring skuif die ligtende trein;

ek sien in die tentjie, deur die oop gordyn,
‘n tafel met bordjies en glasies fyn,
wat sag in die lig van die kersie skyn,
en ek dag: “Was ek net in die tentjie klein,
ek sou tog so gelukkig syn.”

Naas die eensame tent staan ‘n meisie klein,
in stomme bewond’ring van die ligtende trein;
sy sien my geniet my glansende wyn
en kost’like maal by elektriese skyn;
en ek raai die gedagte van die meisie klein:
“Ag, was ek maar net in die vrolike trein,
ek sou tog o so gelukkig syn”.

Sondae is maar net een van daai dae wat mens die gevoel gee dat jy ver van jou huis is en dan lees jy hierdie:

Alleen my lyf in nagslaap gehul
met die maan wat oor my bed streel
lê ek met gedagtes wat woel
en verlange wat hom kom opkrul
soos fetus in my binneste

loop ek deur die gange van my hart
loer in kamers vol herinneringe
soek jou daar tussen liefdes briewe
met songeel strikkies vasgebind
jou stem wat woorde na my bring

sterre knipoog flikker wink vir my
as gedagtes wegsweef na melkweg
waar ons name geskryf is in die hemel
staar ek na die koeëlronde silwer bal
al is jy ver staan ons onder dieselfde maan

Dinge
laat my aan woorde dink
Woorde
laat my aan dinge dink

Ewig vasgevang
in ‘n pendulum
van dinge en woorde
en woorde en dinge

Hier gelees en daar gelees, toe lees ek hierdie ….. (deur Annette Coetzee)

KIES DAN NOU DIE LEWE

‘n Streep in die middel

watter kant gaan jy trap?
Die lewe is erns, dis gladnie ‘n grap
dis immers ‘n keuse, elkeen kry ‘n kans
Waarom die duisternis – die lig is ook daar;
die twee weë gebaan – is jy alreeds daar?

Die maklikste ding is
om langs die breë weg te rus
maar dan gaan jy die Lewe
in die Ewigheid mis

Waar wil jy wees?
In Sigem se poorte
of gaan jy maar deurdruk
na Bet-el se oorde?

Hy’t vir jou ‘n taak beplan
jy moet jou eie wagtoring beman
Pasop vir die dwaasheid
van mense wat wag
en dan aan die slaap raak
terwyl ander selfs lag
Maar wees voorbereid
met jou lampie gevul
vir wanneer die Leeu van Juda
in die verte gaan brul…

Ek hou van Jak de Priester en sy songs en toe lees ek toevallig hierdie gedig van hom.

Man-alleen

Imagine hoe
alleen
dit moet wees om ’n man-man te wees.
’n Man-man, wie met kaal koue emosies
deur die lewe veg.
’n Man-man met ’n muur om hom gebou,
sodat niemand die sensitiewe sy van sy swaarbelaaide siel
kan filtreer nie,
nie eers ’n snel suspisie kry van ’n huilende hart nie.
’n Man-man en sy man-man vriende, wie se
hartseer en pyn dalk in ’n bar gedeel word,
soos kaarte onder ’n dowwe lig
verspeel word,
luidrugtig en vergiftig,
in besope gelag en dronk ego’s
groet,
sonder empatie of traan.

Imagine hoe
alleen
dit moet wees om ’n man-man te wees.
’n Man-man, soos my pa te wees.
Om
man-alleen
te staan in hierdie waardelose wêreld,
terwyl die enigste iets wat eintlik waarde het,
jou hart is,
dié hart
wat juis meer waarde kry as jy dit uitdeel,
soos brood,

onder jou geliefdes.

En eendag
word jy 60,
dalk met ’n duursame partytjie?
En êrens deur die aand van warm kampvure en geurige kos,
orkeste en versierings, geskenke en kleinkinders,
duursame wyn en  sjampanje,
staan jy op vir ’n heildronk…

met jou hart,

yskoud,

in jou hand,

(die trofee van jou lewe)

en jou gesin is die vreemde gesigte,
die weergalmde applous,

want jy staan vandag

man-alleen.

Nou klink ek seker soos ’n agter os, maar ek moet sê, die hele BLOGGER storie is nogal “interesting”. Ek het al ‘n hele paar stories (comments) raak gelees, en weereens moet ek erken, mense en hul ”dinge” interesseer my baie. Ek lees hier en ek lees daar, en in elke stukkie sien ek hoeveel verskillende individue, of sal ek dit “karakters” noem, is ons eintlik.

Behalwe dat ons verskillende individue is, is ons ook natuurlik in verskillende beroepe, en so het ons elkeen ons opinie oor dinge van die lewe natuurlik, bv. * – geloof – * – politieke uitkyk  – *

* – seksualiteit – *  * - smaak – *  * – styl- *  * – geleerdheid – *, en so kan ek aangaan.

Ek het onlangs ‘n post gelees, en vreemd om te sien dat mense nog altyd hulle eie stempel wil af forseer i.v.m seks voor die huwelik. Ai tog mense, ons leef lankal nie meer in daardie ou konserwatiewe era nie.

En nou sê ek definitief nie dat jou kinders, of jy self, toe oë ‘n seksuele verhouding moet aanknoop nie. Want ons het tog waardes, of hoe? Om ‘n baie lang storie kort te maak, soos wie en wat ek is natuurlik, wil ek sê dat indien jy kies om volgens die Bybel te lewe, dan moet jy Sy Woord in alle aspekte van die lewe toepas.

Jy kan nie net Sondae in die kerk sit en as Sondag verby is, of soms nog voor dit verby is, vergeet dat jy self gekies het om volgens die Woord te lewe nie. Ek is lang jare op hierdie aarde, en glo my, ek het al te veel dinge aanskou van die mensdom, om sommer na enige ou se weergawe van die Woord te luister, “sorry” indien ek nou op tone trap, maar dit is hoe dit is.

Ek wil eerder net onthou wat Ouma my van Liewe Jesus geleer het – “My kind, dra vir Liewe Jesus in jou hart en loop die ou reguit spoortjies in die lewe”. Ek stel regtig nie belang om, soos ek reeds gesê het, na elke tweede ou se ontleding van vedraaide woorde te luister nie. Elke tweede man wil jou kom vertel van, daardie boek en daardie vers sê dit en dit. Jammer, maar die regte manier is om die Woord van God in sy geheel te vat en na die beste van jou vermoë daarvolgens te lewe.

 Ek sê ook nie dat ek die Woord so goed ken nie, maar ek gaan definitief nie toelaat dat enige iemand my ‘n rat voor die oë draai wat die eintlike boodskap van God se Woord is nie. Ek verwys natuurlik na niemand met hierdie skrywe nie. Ek stel slegs my opinie.

God se woord dra eintlik net een ding oor, en dit is om gevul te wees met die Heilige Gees, en te glo dat God almagtig is. En dat God jou sal red, al het jy die geloof van ‘n mosterdsaadjie!!